Askari Singida auwawa

Na Evarista Lucas

Singida ,

Desemba 21,2013

Askari wa Jeshi la Polisi Mkoani Singida Zakaria William mwenye namba D.6466 D/SGT  amepoteza maisha papo hapo mapema jana baada ya kupigwa risasi iliyopenya shingoni mwake na mtu anayesadikiwa ni jambazi.

Akitoa taarifa kwa vyombo vya habari mapema leo katika ofisi yake; Kamanda wa Polisi mkoani Singida Bwana Geofrey Kamwela amesema tukio hilo la kusikitisha limetokea majira ya saa nne na nusu  za usiku katika kijiji cha Tambukareli katika kata ya Majengo iliyopo wilayani Manyoni mkoani hapa.

Kamanda Kamwela ameeleza kuwa;  tukio hilo limetokea wakati askari huyo akiwa  katika doria na askari wenzie walipopata taarifa kutoka kwa raia wema kuwa katika nyumba moja ya mali ya Stanley Mpaki (Almaarufu kama Babu Mpaki) mfanyabiashara na mkulima anaishi na watu wanaosadikiwa kuwa ni majambazi.

Baada ya kupata taarifa hizo marehemu na wenzie walifika katika nyumba hiyo ambapo  baadhi ya askari waliingia ndani ili kuwakamata watuhumiwa na  marehemu alikuwa amebaki nje ambapo alipigwa risasi na mmoja kati ya majambazi hao aliyetoroka kusikojulikana na kupoteza maisha papo hapo.

Katika nyumba hiyo watu wanne wamekamatwa ikiwa ni pamoja na bunduki aina ya SMG yenye namba UA ikiwa na risasi ishirini na tano ndani ya magazine moja na bastola moja ya kienyeji yenye uwezo wa kutumia risasi za shotgun pamoja na risasi saba.

Aidha; Kamanda Kamwela amewataja majambazi waliokamatwa  ktika tukio hilo ni pamoja na Joseph Hemed mwenye umri wa miaka ishirini na tisa mkulima na mkazi wa Siuyu, Ikungi; Juma Ramadhan miaka ishirini mkulima na mkazi wa Kizota, Dodoma; Abdallah Hamis ini na moja, miaka ishirmkulima na mkazi wa Milera Ikungi na Stanley Mpaki miaka ishirini na minane mkazi wa Itigi ambao walitambuliwa kuwa ni wahalifu wazoefu kutokana na kuhusika kwao katika matukio mbali mbali ya uhalifu wa kutumia silaha.

Sanjari na hayo Kamanda Kamwela amesema Jeshi la polisi Mkoani hapa linaendelea na uchunguzi wake juu ya tukio hilo  ikiwa ni pamoja na kumsaka mtuhumiwa aliyetoroka na uchunguzi utakapoakamilika watuhumiwa hao watafikishwa  mahakamani kujibu tuhuma zinazowakabili.

Kwa upande wa Jeshi la Polisi  mkoa wa Singida hili ni tukio la pili ambalo limepelekea askari wake wawili kupoteza maisha wakiwa kazini, ambapo askari wa kwanza  alipoteza maisha katika oparesheni tokomeza majangiri huko Manyoni baada ya kushambuliwa na majangiri.

Kwa upande mwingine  Kamanda Kamwela amesema umilikaji silaha kinyume cha sheria ndiko kunakopelekea kuibuka kwa vitendo vya ujambazi na kuwashukuru  raia wema wote ambao wamekuwa wakitoa  ushirikiano kwa jeshi la polisi na kuongeza kuwa uhai wa askari marehemu Zakaria umepotea kutokana na silaha haramu.

Pia;  Kamanda Kamwela ametoa wito kwa wananchi wote kuendelea  na moyo wa kutoa taarifa kwa Jeshi la polisi na vyombo vingine vya ulinzi na usalama kuhusu uhalifu au wahalifu na matishio mengine ya usalama ili yafanyiwe kazi haraka na kuepusha madhara kwa watu na mali.

 

MWISHO