VIFO - SINGIDA

Na Evarista Lucas

Singida

Jan.02, 2014

Imeripotiwa  kuwa watu wawili wamepoteza maisha katika matukio mawili tofauti mkoani Singida; ambapo katika tukio la kwanza Mwanahamisi Mwangu mwenye umri wa miaka 72  amepoteza maisha baada ya kupigwa mateke na ngumi na Salehe Mohammed mume wake wa ndoa Salehe Mohammed   mwenye umri wa miaka 75.

Akitoa taarifa kwa vyombo vya habari mkoani hapa; Kamanda wa polisi mkoa wa Singida bwana  Geofrey Kamwela amesema; marehemu Mwanahamisi alipoteza maisha kutokana na kupigwa mateke na ngumi na mume wake hali  iliyopelekea kifo ni chake.

Kamwela amesema tukio hilo lilowahusisha wanandoa hao ambao ni wakazi wa kijiji cha Mwasutianga kata ya Irisya wilaya ya Ikungi mkoani hapa; limetokea desemba 30 mwaka jana majira ya saa saba mchana huko katika kijiji cha Mwasutianga.

Kamwela amesema siku ya tukio,mzee Salehe alikuwa akilima shambani kwake na mke wake mkubwa Mwanahamisi na mke mdogo Fatuma Ramadhani (55).wakati wandoa hao wakiendelea kulima,ghafla kulizuka ugomvi baina ya wake wa mzee Salehe wakigombea ndoo ya maji ambayo inadaiwa ilikuwa mali ya mke mdogo Fatuma.

Kamwela amesema mtuhumiwa mzee Salehe katika ugomvi huo,alikuwa upande wa mke mdogo ambapo alianza kumpiga mateke na ngumi katika sehemu za mwili wa mke mkubwa Mwanahamisi na kusababisha kifo chake papo hapo

Katika tukio jingine Kamwela amesema Shauri Samwel (22) mkazi wa kijiji cha Tyeme tarafa ya Shelui wilaya ya Iramba,amefariki dunia baada ya kunywa vidonge vya kuhifadhia nafaka vinavyodhaniwa kuwa na sumu kali.

Amesema tukio hilo limetokea desemba 31 mwaka jana saa 12 jioni huko katika zahanati ya kijiji cha Tyeme wakati Shauri alikuwa akiendelea kupatiwa matibabu.

Kamwela amesema chanzo cha kunywa vidonge hivyo vya sumu,ni hofu aliyokuwa nayo Sahauri kutokana na kumpa mimba binamu yake.

MWISHO.